Республика бойынша жалақысы төмен жұмысшылар 29 млрд теңге қосымша жалақы алады. Бұл туралы бүгін ҚР Парламенті Сенатында өтіп жатқан жергілікті өкілдік органдармен өзара іс-қимыл жөніндегі кеңес отырысында Ұлттық экономика вице-министрі Руслан Дәленов айтты.

«Ағымдағы жылдың 5 наурызында Мемлекет басшысы 5 әлеуметтік бастамасын жариялады. Екінші бастамаға сәйкес, 25 айлық есептік көрсеткіш немесе 63 мың теңгеден төмен жалақы алатындар үшін жеке табыс салығының мөлшерлемесі 10 есеге азайтылады. Жалпы республикада мұндай еңбекақыны 2 миллионнан астам адам алады. Негінен бұл - ауыл шаруашылығы мен саудада», - деді ол.

Оның айтуынша, аталған бастаманы іске асыру мақсатында мемлекеттік органдармен және «Атамекен» ұлттық кәсіпкерлер палатасымен бірлескен жұмыс жүргізілді. Жұмыс нәтижесі бойынша жалақысы төмен жұмысшылардың жеке табыс салығын төмендетудің оңтайлы тетігі айқындалды.

«Мәселен, айлыққа салынатын табыс салығы 90 пайызға азайтылатын болады. Қалған еңбекақыға 10 пайыз мөлшерлемемен жеке табыс салығы салынады. Яғни, салық жүктемесі 10 есеге төмендейді. Сонымен бірге жұмыс берушінің әкімшілік шығындары барынша азайтылды. Жалпы республика бойынша жұмысшылар 29 млрд теңге шамасында қосымша еңбекақы алатын болады», - деді Руслан Дәленов.

ҚазАқпарат

Бұрынғы «Нұрлы жер» бағдарламасы жаңа бағдарламадан несімен ерекшеленетіні туралы бүгін Үкімет отырысының қорытындысы бойынша өткен брифингте инвестициялар және даму вице-министрі Қайырбек Өскенбаев айтып берді.

Журналистердің сұрақтарына жауап бере отырып, Қайырбек Өскенбаев мемлекеттік жоспарлау жүйесіне сәйкес «Нұрлы жер» бағдарламасы Үкімет отырысында мемлекеттік статусымен қайта бекітілгенін атап өтті. Осыған дейін салалық болған бағдарламаның іске асырылуына Инвестициялар және даму министрлігі жауапты еді.

«Президенттің бес әлеуметтік бастамасының» біріншісін іске асыруға және «Нұрлы жер» бағдарламасына түзетулер енгізуге байланысты ол енді мемлекеттік бағдарлама болды.

Жалпы, қабылданған шаралар жыл сайын тұрғын үйді енгізу көлемінің өсім динамикасын 8% немесе жылына 8 мыңнан астам тұрғын үйге қамтамасыз етуге және 2030 ж. қарай тұрғын үймен қамту көрсеткішін бір адамға шаққанда 30 м² дейін жеткізуге мүмкіндік береді.

Мәселен, 2019 ж. бастап сатып алу құқығынсыз жалға берілетін тұрғын үй құрылысын қаржыландыру жыл сайын 10 млрд теңгеге арттырылып отырады. Тағы мыңға жуық азамат жылына қосымша әлеуметтік тұрғын үйлерге ие болады. Артып келе жатқан құрылыс қарқынын қамтамасыз ету үшін құрылыс алаңдарын инженерлік желілермен жарақтауды қаржыландыруды 20 млрд теңгеге арттыру қарастырылып отыр.

Несиеге берілетін тұрғын үйді тек «Тұрғын үй құрылыс жинақ банкі» салымшыларына ғана емес, екінші деңгейлі банктердің салымшыларына да сату көзделген. Мұндай шарттар бағасы қолжетімді болғандықтан, «7–20–25» ипотекалық бағдарламасының дамуына зор серпін береді.

«Біз "Нұрлы жер" бағдарламасын "7–20–25" президенттік ипотекалық несиелендіру бағдарламасын ескере отырып, түзеттік. Біздің міндетіміз – оған қатысушылардың барлығын жаңа тұрғын үймен қамтамасыз ету», — деді Қ. Өскенбаев.

Еске салайық, бүгін Үкімет отырысында «Нұрлы жер» бағдарламасын іске асыру және өзектілендіру туралы мәселе қаралды.

www.primeminister.kz

Бүгін Үкімет отырысының қорытындысы бойынша өткен баспасөз конференциясында инвестициялар және даму вице-министрі Қайырбек Өскенбаев журналистердің «Нұрлы жер» тұрғын үй құрылысы мемлекеттік бағдарламасын іске асыру және өзектендіруге қатысты сұрақтарына жауап берді.

Брифингте журналистер вице-министрге «7–20–25» бағдарламасын іске асыруға байланысты тұрғын үй бағасының өсуі ықтимал ма деген сауал қойды. Қайырбек Өскенбаев тұрғын үй нарығындағы баға өспейтініне сендірді.

«Біз Үкімет тарапынан көптеген тұрғын үй құрылысы жұмыстарын жүргізіп жатырмыз. "Нұрлы жер" тұрғын үй құрылысы бағдарламасының аясында біз шектеу қойдық: өңірлерде шаршы метрдің бағасы 140 000 теңгеден, Астана, Алматы, Атырау, Ақтау қалаларында – 180 000 теңгеден аспауы керек. Сондықтан, менің ойымша, аса елеулі өзгерістер болмайды. Бағалар бұрынғысынша сақталады», — деп түсіндіріп өтті вице-министр.

Бұдан кейін Қайырбек Өскенбаев тұрғын үй құрылысының сапасын жақсарту жөнінде қабылданып жатқан шаралар туралы сұраққа жауап берді. Оның айтуынша, қазіргі таңда құрылыс бақылау жүйесін жетілдіру және барлық құрылыс саласын цифрлық форматқа көшіру жұмыстары жүргізілуде.

«Қазір біз үйлерді салу сапасын бақылау жүйесін айтарлықтай күшейтіп жатырмыз. Кеңес кезінен бастап мемлекеттік комиссиялар үйлерді қабылдап келді. Бірнеше жыл бұрын біз өзгерістер енгіздік. Бұл учаскені тікелей салатын нарық қатысушылары бар: құрылыс салушы, мердігер, авторлық және техникалық қадағалау», — деді вице-министр.

Оның айтуынша, бұдан былай әр құрылыс қатысушысына қатысты қылмыстық және әкімшілік жауапкершілік қарастырылатын болады.

Бұдан өзге, құрылыстың ашықтығы мен сапасын қамтамасыз ету мақсатында барлық қағаз журналдары электрондық форматқа көшіріледі.

«Бүгінгі таңда бізде құрылыс кезінде қолданылатын бес журнал бар. Енді оларды арнайы ашылған электрондық порталда көруге тиіспіз. Нарықтың барлық қатысушылары ЭЦҚ алуы керек. Мемлекеттік органдар жалпы ел бойынша құрылыс жұмыстарының барысын көріп отырады. Олар хабарландырулар жібере алатын болады. Егер бұл жеткіліксіз болса, тексерулер жүргізілетін болады», — деді Қ. Өскенбаев. Аталған жүйе биыл енгізіледі.

Бұған дейін, ҚР Премьер-Министрі Бақытжан Сағынтаевтың төрағалығымен өткен Үкімет отырысында инвестициялар және даму бірінші вице-министрі Роман Скляр «Нұрлы жер» тұрғын үй құрылысы бағдарламасын іске асыру барысы туралы баяндады. Мемлекеттік жоспарлау жүйесіне сәйкес Мемлекет басшысының «Бес әлеуметтік бастама» халыққа үндеуін жүзеге асыру аясында «Нұрлы жер» бағдарламасы мемлекеттік бағдарлама ретінде қайта бекітілді. 2019 жылдан бастап, жыл сайынғы сатып алу құқығынсыз жалға берілетін тұрғын үйдің құрылысына қаржыландыруды 10 млрд теңгеге дейін арттыру ұсынылады. Бұл әлеуметтік тұрғын үймен жыл сайын шамамен тағы мың азаматты қамтамасыз етуге мүмкіндік береді.

www.primeminister.kz

2025 жылға қарай Қазақстан мұнай өндіру көлемін 104 млн тоннаға жеткізеді. Бұл туралы бүгін елордада халыққа есеп беру кездесуі барысында ҚР Энергетика министрі Қанат Бозымбаев айтты.

«Барлық секторлар шегіндегі көрсеткіштерде мұнай-газ саласы өткен жылдың сәйкес кезеңімен салыстырғанда өсім көрсетіп отыр. Жоспарлы 1 пайыз өсім кезіндегі нақты өсім бес айда 6,5 пайызды құрап отыр. Мұнайды қайда өңдеу көлемі 6,3 млн тоннаға жетіп, 2017 жылдың сәйкес кезеңімен салыстырғанда 6,2 пайыз өсім болды», - деді министр.

Оның айтуынша, мұнай экспорттау өсімінің жоспары 1,4 пайыз болған, ал нақты өсім 5,7 пайызға жетіп отыр. Газ өндіру жоспары 0,8 пайыз болғанда, нақты өсім 6,4 пайызға жетті. Сұйытылған және тауарлық газ өндірісі өсімінің жоспары 3 және 4,1 пайызды құраса, нақты өсім сәйкесінше 4,7 және 7,6 пайызды құрады.

«Өздеріңіз де көріп отырғандай, динамика таң қалдырады. Еліміздің мұнай өндіру өсімінің драйвері теңіз, Қарашығанақ және Қашаған сынды үш ірі мұнай-газ жобасы болып тұр. Олар орта мерзімді кезеңде ел экономикасының өсіміне айтарлықтай үлес қосады. Мұнай өндіру көлемі жыл сайын артып келеді және біздің болжамымызша, 2025 жылға қарай кемінде 104 млн тонналық деңгейге жетуге тиіспіз», - деді Қанат Бозымбаев.

ҚазАқпарат

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында Алматы агломерациясын іске асыру барысы туралы ұлттық экономика министрі Т. Сүлейменов, инвестициялар және даму бірінші вице-министрі Р. Скляр, Алматы қаласының әкімі Б. Байбек және Алматы облысы әкімінің орынбасары Л. Тұрлашов баяндады.

Алматы агломерациясын Қазақстанның әлемдік деңгейдегі негізгі қаласы бар ұзақмерзімді өсу полюсі ретінде қалыптастыру мақсатында Алматы агломерациясын дамыту жөніндегі іс-шаралардың 2020 жылға дейінгі өңіралалық жоспары қабылданды. Үш негізгі міндеттер бойынша 67 іс-шараны іске асыру көзделген.

Жоспарды іске асыру барысы туралы ұлттық экономика министрі Т. Сүлейменов баяндады.

Ұлттық экономика министрлігінің мәліметтері бойынша, агломерация аумағы — 9,4 мың ш.км (939,5 мың га) құрайды. Алматы қаласының тартылыс аймағына экономикалық, еңбек және әлеуметтік тұрғыдан тығыз байланысты Талғар, Есік, Қаскелең, Қапшағай қалалары мен Еңбекшіқазақ, Жамбыл, Іле, Қарасай және Талғар аудандарының елді мекендері кіреді. Агломерация халқының саны 2017 жылдың қорытындысы бойынша 2,9 млн адамды, оның ішінде Алматы қаласында — 1,8 млн адамды құрайды. Алматы қаласы халқының тығыздығы 1 ш. км. 2,6 мың адамды құрайды. Жалпы, өткен жылдың қорытындысы бойынша елдің ЖІӨ-дегі қаланың ЖӨӨ үлесі шамамен 22% құрайды.

Біріншісі. Алматы агломерациясын аумақтық және институционалдық дамыту. Қала құрылысын жоспарлау құжаты — Алматы агломерациясын аумақтық дамытудың өңіраралық схемасы әзірленіп, бекітілді. Жалпы бірінші міндеттің жоспарланған жеті іс-шарасының ішінде алты іс-шара орындалды, бір шара орындалу сатысында.

Екіншісі. Республикалық және өңірлік нарықтарда Алматы агломерациясын экономикалық орнықтыру. Алматы қаласының Алатау ауданында инновациялық және экологиялық таза өндіріске басымдықпен индустриалдық аймақ құрылды. «Ақпараттық технологиялар паркі» АЭА басқарудың жаңа моделі дербес кластерлік қор негізінде енгізілді.

«Қызмет көрсету саласын дамыту, соның ішінде экологиялық туризмді жетілдіру жұмыстары жүргізілді. Мәселен, «Шарын», «Алтын Емел», «Іле Алатауы» мемлекеттік ұлттық табиғи парктерін және «Алма-Арасан», «Алматы», «Қазақстан» өңірлік шипажайларын және т.б. дамыту және танымал ету жөніндегі іс-шараларды іске асыру», — деп атап өтті Т. Сүлейменов.

Жалпы алғанда екінші міндеттің жоспарланған 20 іс-шарасының 19-ы орындалды, 1 шара — Smart Сity тұжырымдамасын іске асыру міндеті орындалу сатысында.

Үшіншісі. Негізгі қала Алматыны, оның қала маңы аймағын және тартылыс аймағын инфрақұрылымдық үйлестіріп дамыту. «Сайран» және «Мәскеу» метро станцияларының құрылысы аяқталды, қазіргі кезде «Сарыарқа» және «Достық» екі метро станциясының құрылысы бойынша жұмыстар жүргізілуде. Жалпы үшінші міндеттің жоспарланған 40 іс-шарасының 36-сы орындалды, орындау сатысында 4 шара қалды.

Сондай-ақ, ҚР ИДМ Алматы агломерациясын дамытудың 2030 жылға дейінгі жобасын әзірледі. Жобаны бекіту мерзімі — 2018 ж. 1 шілде.

«Мемлекет басшысының тапсырмаларын орындау мақсатында Алматы агломерациясын қалыптастырудың 2030 жылға дейінгі ұзақмерзімді жоспарының жобасы әзірленді, онда 150-ден астам іс-шараларды қарастырылған», — деді инвестициялар және даму бірінші вице-министрі Роман Скляр.

Алматы агломерациясы аумағында өндірістік және логистикалық шағын аймақтар құрылады, олар Алматы қаласынан шығарылатын өнеркәсіптік және қойма кәсіпорындарының қайта орналасуына арналған. Соңғы бес жыл ішінде агломерацияның шеткі аймақтарына 31 өнеркәсіптік кәсіпорын шығарылған. Сонымен қатар Алматы қаласындағы жұмыс істеп тұрған кәсіпорындарды индустриялық аймақтарға шығару бойынша жұмыстар жүргізіліп жатыр.

Инновациялық технологиялар мен өнеркәсіптік аймақтар паркін орналастыруға арналған перспективалы территориялардың аумағы — 3482 га.

«Алатау ауданындағы индустриялық аймақ 500 га аумақ болатын территорияға орналастырылған, оның ішінде 390 га құрылыс материалдарын, жиһаз бен машина жасау өнімдерін өндіретін кәсіпорындарды, сонымен қатар тамақ, жеңіл және фармацевтикалық өнеркәсіптерді орналастыруға бөлінген. Индустриялық аймақта алты өнеркәсіптік аймақ бар: машина жасау, азық-түлік, фармацевтика, химия, жиһаз және жеңіл өнеркәсіп», — деді Р. Скляр.

Алатау ауданында индустриялық аймақтан басқа, келесі индустриялық аймақтар одан әрі дамытылатын болады: Арна, Боралдай, Қайрат. Р. Склярдің айтуынша, кенттену процесінің дамуына «Алматының бір конгломерат қалаға біріктірілген төрт серіктес қаласын салу — төрт шағын қала салу (жұмыс атаулары GateCity (“Қақпа қаласы”), GoldenCity (“Алтын қала”), GrowingCity (“Өсу қаласы”) және GreenCity (“Жасыл қала”)» жобасын іске асыру зор ықпалын тигізеді.

Алматы қаласының әкімі Бауыржан Байбек осы жылдың соңына дейін жекеменшік сектордың газбен қамтамасыз етілетінін айтты, ал 2021 ж. қарай Алматы агломерациясының қала маңындағы аймағында тағы бірнеше мың жекеменшік үйлер газға қосылады. Бұдан өзге, ЖЭО-2 қазандығын газға көшіру жобасы бойынша жұмыстар басталды. Бұдан өзге, Алматы қаласының әкімдігі мультимодальді негізде қаланың қоғамдық көлігін дамытудың ұзақмерзімді сұлбасын әзірледі. Алматы қаласының және Алматы облысының 2015–2025 жылдарға арналған денсаулық сақтау және білім беру ұйымдарының желісін дамытудың перспективалы жоспарлары әзірленіп, бекітілді. Сонымен қатар, Алматы қаласында жеңіл рельсті көлік (LRT) желісін салу бойынша концессиялық жобаның ТЭН әзірлеу бойынша жұмыстар жүргізілді.

Өз баяндамасында Алматы облысы әкімінің орынбасары Ләззат Тұрлашов тұрғын үй құрылысы мемлекеттік қолдаудың барлық шараларымен қамтамасыз етілетінін атап өтті: жер телімдері бөлініп, инженерлік инфрақұрылымдар жүргізіледі, құрылыс индустрияландырылады. ҮАААЖ (Үлкен Алматы айналм автокөлік жолы) құрылысы кезінде қосымша жұмыс орындары ашылады. Жобаны іске қосу ел экономикасының дамуына серпін береді.

Мәселені қарау қорытындысы бойынша ҚР Премьер-Министрі Бақытжан Сағынтаев Ұлттық экономика министрлігіне мүдделі мемлекеттік органдармен және әкімдіктермен бірлесіп Алматы агломерациясын дамыту бойынша іс-шараларды сапалы іске асыруды қамтамасыз етуді тапсырды.

«Алматы агломерациясы бәсекелі экономикасы, жоғары сапалы өмір сүру және қоршаған ортасы бар көпфункционалды аймақ ретінде дамуы, аймақтың территориялық-кеңістіктік дамуын, халықтың тығыздығын, көші-қонды жоспарлау бойынша қала мен облыс әкімдіктері арасындағы өзара іс-қимыл мәселелерін шешуі тиіс», — деді Бақытжан Сағынтаев.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында «Нұрлы жер» тұрғын үй құрылысы бағдарламасын іске асыру мәселесі қаралды, оның қорытындысы бойынша бағдарламаны мемлекеттік статусымен қайта бекіту туралы қаулы жобасы қабылданды.

Инвестициялар және даму бірінші вице-министрі Роман Скляр өз баяндамасында атап өткендей, мемлекеттік жоспарлау жүйесіне сәйкес «Нұрлы жер» бағдарламасы мемлекеттік статусына қайта бекітіледі.

«Жобада Мемлекет басшысының Қазақстан халқына «Бес әлеуметтік бастама» үндеуін іске асыруға арналған нормалар қарастырылған. 2019 жылдан бастап, жыл сайынғы сатып алу мүмкіндігінсіз жалға берілетін тұрғын үйдің құрылысына қаржыландыруды 10 млрд теңгеге дейін арттыру ұсынылады. Бұл әлеуметтік тұрғын үймен жыл сайын шамамен тағы 1 мың азаматты қамтамасыз етуге мүмкіндік береді», — деді Р. Скляр.

Құрылыстың көлемін арттыру үшін құрылыс алаңдарын инженерлік желілермен қамтамасыз етуге қаржыландыруды 20 млрд теңгеге арттыру көзделген. Сондай-ақ, мемлекеттік және мемлекеттік емес кәсіпорындар үшін өз қызметкерлерін қолдау бойынша нормалар қарастырылған. Бірінші вице-министрдің айтуынша, осындай ұйымдар өз қызметкерлеріне тұрғын үй қарыздарын бастапқы жарна ретінде бере алатын болады. Бұл мұғалімдер, дәрігерлер және мемлекеттік қызметкерлер үшін тұрғын үй проблемаларын шешу үшін үлкен көмек болады.

«Енгізіліп жатқан өзгерістер аясында жеке құрылыс салушылардың бағдарламаға белсенді қатысуы үшін әкімдіктерге салынған нысандарды сатып алу құқығы беріледі. Несиелік үйлерді Тұрғын үй құрылыс жинақ банкінің салымшыларымен қатар, Екінші деңгейдегі банктердің салымшыларына да өткізу көзделген. Бұл талаптар әкімдіктер салып жатқан үйлердің қолжетімді бағалық параметрлеріне байланысты «7-20-25» ипотекалық бағдарламасының дамуына үлкен серпін береді», — деді Р. Скляр.

Жалпы, қабылданған нормалар тұрғын үй құрылысының қарқынын 8%-ға немесе жылына 8 мыңнан астам баспананы пайдалануға беру көрсеткішінің өсімін қамтамасыз етеді және 2030 жылға қарай бір адамға шаққандағы тұрғын үймен қамтамасыз етілуі көрсеткішін 30 шаршы метрге дейін жеткізуге мүмкіндік береді.

Инвестициялар және даму министрлігінің деректеріне сәйкес, осы жылдың 5 айының қорытындысы бойынша елімізде 4,6 млн шаршы метр тұрғын үй пайдалануға берілді, бұл 2017 жылдың осындай кезеңімен салыстырғанда 2,7%-ға артық.

«40,3 мыңнан аса отбасы, оның ішінде 2 мыңға жуық отбасы мемлекет қаражаты есебінен өздерінің тұрғын үй жағдайларын жақсартты. Осы салаға жұмсалған инвестициялар өткен жылдың сәйкес кезеңімен салыстырғанда 29,9%-ға артып, 391 млрд астам теңгені құрады», — деп мәлімдеді ҚР ИДМ бірінші вице-министрі Роман Скляр.

Оның айтуынша, тұрғын үйдің көп көлемі Астана, Алматы қалаларында және Маңғыстау облысында пайдалануға берілген. Алматы (51%), Оңтүстік Қазақстан (43,8%), Маңғыстау (43%), Батыс Қазақстан (39,9%) облыстарында тұрғын үйді беру қарқынының едәуір артқаны байқалады.

Биыл бағдарламаны іске асыру аясында 12,1 млн шаршы метрден кем емес тұрғын үйді пайдалануға беруді қамтамасыз ету көзделіп отыр. Бюджет қаражаты есебінен 22 мыңнан астам немесе 1,3 млн шаршы метр пәтерді пайдалануға беру жоспарланған. Бағдарламаны іске асыруға жалпы республикалық бюджеттен 2018 жылға 148,6 млрд теңге қарастырылған.

«Бәйтерек» ҰБХ АҚ төрағасы Айдар Әріпханов мәлім еткендей, 1 маусымдағы жағдай бойынша «Байтерек Девелопмент» АҚ желісі бойынша 31,9 млрд теңгеге субсидиялау келісімшарты жасалған. Барлығы ЕДБ қарауына займ сомасы 53,3 млрд теңге болатын 59 жоба келіп түскен. 57,6 мың шаршы метр салынған, оның ішінде 2017 ж. — 8,4 мың ш.м., 2018 ж. — 49,2 мың ш. м.

Облыстағы тұрғын үй құрылысының жай-күйі туралы Қызылорда облысының әкімі Қырымбек Көшербаев, Павлодар облысының әкімі Болат Бақауов, Батыс Қазақстан облысының әкімі Алтай Көлгінов, сонымен қатар Астана және Алматы қалаларының әкімдері Әсет Исекешев пен Бауыржан Бәйбек баяндады.

Мәселені қарау қорытындысы бойынша Үкімет мүшелері тиісті қаулы жобасын бірауыздан қолдады.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында агроөнеркәсіп кешенін дамытудың мемлекеттік бағдарламасын өзектендіру мәселелері қаралды.

Мемлекет басшысы «Төртінші өнеркәсіптік революция жағдайындағы дамудың жаңа мүмкіндіктері» жолдауында агроөнеркәсіп кешеннің алдына еңбек өнімділігі мен өңделген ауыл шаруашылығы өнімінің экспортын бес жыл ішінде кемінде 2,5 есеге арттыру міндетін қойды.

Ауыл шаруашылығы бірінші вице-министрі Арман Евниев етті және сүтті мал шаруашылығын, құс шаруашылығын, суармалы жерлерді, қант саласын дамыту бойынша 10 және одан көп жылға арналған ұзақ мерзімді салалық бағдарламалар әзірленгенін баяндады.

«АӨК мемлекеттік бағдарламасы саланың негізгі тұжырымдамалық және АӨК цифрландыру, техреттеу, салық салу, ауылдық аумақтар секілді онымен сабақтас бағыттарды шешуді көздейтін болады және мемлекеттік бағдарламаның бір бөлігі ретінде салалық және сабақтас бағдарламалар тізілетін ашық платформа болады», — деп мәлімдеді А. Евниев.

Етті мал шаруашылығын дамыту бағдарламасының негізін ІҚМ өсіру бойынша фермерлік шаруашылықтардан, өнеркәсіптік бордақылау алаңдарынан және заманауи ет өңдеу кешендерінен тұратын зәкірлік кооперациялар формасындағы отбасылық фермалар түріндегі шағын шаруашылықтар құрайды.

Мал шаруашылығымен, қой және жылқы шаруашылығымен айналысатын 80 мыңнан астам отбасылық фермаларды құру, жайылымдарды 58 млн га-дан 100 млн га-ға дейін кеңейту, ірі қара малдың санын 15 млн-ға дейін, қойлардың санын 30 млн-ға дейін жеткізу көзделген.

Ет мал шаруашылығын дамыту бағдарламасына қатысушыларға жеке қолдау шаралары ұсынылады: жер телімдерін басымдықпен бөлу, фермерлік шаруашылықтарға мал басын сатып алу үшін, техника мен жабдықтарды сатып алуға жеңілдікті несие беру, жайылым инфрақұрылымын құру.

Сүт мал шаруашылығы бағдарламасы сүт өндіру, өнеркәсіптік сүт–тауар фермалары мен заманауи сүт зауыттары бойынша отбасылық фермалардан тұратын зәкірлік кооперация қағидатына сәйкес құрылады. Отбасылық фермалардың санын 380-нен 930-ға дейін, ірі сүт-тауар фермаларын 108-ден 170-ке дейін, сүт зауыттарының санын 163-тен 174-ге дейін ұлғайту жоспарланған. Нәтижесінде сүт өндіру көлемін 1 млн т-ға ұлғайту көзделген.

Құс шаруашылығын дамыту бағдарламасы аясында құс етін өндіру көлемі 4 есеге немесе 560 мың тоннаға дейін (180-нен 740 мың тоннаға дейін) ұлғайтылады, оның 150 мың тоннасын экспорттау жоспарланған; жұмыртқа өндіру көлемі 1,5 есеге немесе 2,5 млрд жұмыртқаға (5 млрд данадан 7,5 млрд данаға дейін) ұлғаяды, оның 1,5 млрд-ды экспортталады.

А. Евниев сондай-ақ биыл тұқым шаруашылығын субсидиялаудың жаңа тетігі енгізілетінін айтты, оның аясында белгіленген нормалар бойынша фермерлердің тұқым сатып алуға жұмсаған шығындарын 100% өтеу қарастырылған. Сонымен бірге, мемлекет тұқым шаруашылықтарына элиталық тұқымдардың немесе фермерге берілген І репродукциялы тұқымдардың толық құнын өтейді. Бұдан өзге, вице-министрдің айтуынша, фермерлерге субсидия алу үшін көптеген құжаттарды жинаудың қажеті жоқ.

Техникалық жарақтандыруды арттыру міндеті лизинг бойынша пайыздық мөлшерлемені субсидиялау арқылы және инвестициялық субсидиялардың көлемі бойынша шешілетін болады. Аталған шаралардың арқасында бес жыл ішінде ауыл шаруашылығы техникасының паркі оңтайлы деңгейге жеткізіледі, бұл алдағы жылдары жылына 6% деңгейінде жаңарудың нормативтік қарқынына жетуге жол ашады. Осы жылдан бастап инвестициялық субсидиялау аясында қайтару мөлшерлемесі 25% құрайды.

Мемлекеттік бағдарлама аясында суармалы жерлердің жалпы көлемін 2 млн га дейін жеткізу көзделген.

Сонымен қатар аграрлық ғылымды реформалау бойынша жұмыстар жүргізіледі. Мемлекет басшысының тапсырмасы бойынша аграрлық жоғары оқу орындарына зерттеу мәртебесін беру жоспарланып отыр. Аграрлық ғылымды қаржыландыруды 2030 ж. ауыл шаруашылығы жалпы өнімдері көлемінен 1% дейін жеткізу жоспарланған, оның ішінде 2021 ж. 0,5% дейін жеткізу көзделген.

«Мемлекеттік бағдарлама жобасында ауыл аумақтарын дамыту бойынша шаралар кешені қарастырылған, ол АӨК шектес бағдарламаларды әзірлеу арқылы іске асырылатын болады. Жобалық тәсіл бағдарламалық құжаттарды әзірлеу мен келісу кезінде бюрократиялық кедергілер мәселелерін шешуге мүмкіндік», — деп түйіндеді А. Евниев.

Ұлттық экономика министрі Тимур Сүлейменов өз кезегінде АӨК дамытудың мемлекеттік бағдарламасына түзетулер енгізу 4 теңге жеке инвестицияға шаққанда 1 теңге бюджет қаражатын тартуға мүмкіндік беретінін айтты. Тұқымын одан әрі жетілдіру үшін асыл тұқымды аналық мал басын әкелу бойынша шараларды қабылдау мал шаруашылығындағы жалпы өнімді 200 млрд тг немесе 10% арттыруға мүмкіндік береді.

«Жалпы, мемлекеттік бағдарламаны іске асыру 2021 ж. қарай жалпы ауыл шаруашылығы өнімдерінің (қызметінің) нақты көлем индексін 2015 ж. салыстырғанда екі есеге арттыруға мүмкіндік береді, 2015 ж. деңгеймен салыстырғанда 2021 ж. ауыл шаруашылығындағы негізгі капиталға инвестициялардың нақты көлем индексі бес есеге артады. Инвестициялық субсидиялар есебінен тартылған инвестициялар көлемі 2021 ж. 751,2 млрд тг құрайды, 2021 ж. АӨК өңделген өнім экспортының көлемі $2,2 млрд болады, бұл 2015 ж. деңгейден 2,3 есеге артық ($945 млн)», — деп қорытындылады Т. Сүлейменов.

Отырыста сонымен қатар «ҚазАгро» ҰБХ басқарма төрағасы Н. Мәлеловтың, «Атамекен» ҰКП төрағасы А. Мырзахметовтың баяндамасы тыңдалды.

Суарылатын жерлер туралы өзінің пікірімен Азия даму банкінің Қазақстандағы өкілдігінің директоры Джованни Капанелли бөлісті.

Сонымен қатар мәселені қарастыру кезінде Ақтөбе облысының әкімі Б. Сапарбаев, Оңтүстік Қазақстан облысының әкімі Ж. Түймебаев, Солтүстік Қазақстан облысының әкімі Қ. Ақсақалов сөз сөйледі.

Премьер-Министрдің орынбасары Ерболат Досаев, Премьер-Министрдің орынбасары – ауыл шаруашылығы министрі Өмірзақ Шөкеев, «Самұрық-Қазына» ҰӘҚ АҚ басқарма төрағасы Ахметжан Есімов талқылауға қатысты түсініктеме берді.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында күн тәртібінен тыс Жамбыл облысында «Астана — Алматы» пойызының жолаушылар вагондарының жолдан шығып кетуіне қатысты мәселе қаралды.

Мәлім болғандай, орын алған оқиға салдарынан 25 жолаушы түрлі жарақаттар алып, 12 жасар бала қаза тапты. Бақытжан Сағынтаев қайтыс болған баланың ата-анасы мен жақындарының қайғысына ортақтасатынын білдіріп, көңіл айтты.

Вагондардың жолдан шығып кетуі себептерін анықтау үшін вагондардың жолдан шығу салдарын жою бойынша іс-қимылдарды үйлестіру мақсатында жедел штаб құрылды. Бейнеконференциялық байланыс арқылы штаб жұмысы туралы «Қазақстан темір жолы» ҰК президенті Қанат Алпысбаев баяндады.

Қ. Алпысбаевтың айтуынша, бұл оқиғада пойыздардың бұрын орын алған жолдан шығып кету оқиғаларына ұқсамайтын бірқатар айрықша техникалық көрсеткіштер бар. Дәлірек айтқанда — рельстердің бойлық орын ауыстыруының болмауы және жолдың тура учаскесінде рельстен шығып кетуі. Аталған учаскені жоспарлы диагностикалау жұмыстары соңғы рет 06.06.2018 ж. жүргізілгені аталып өтті, ескертулер болған емес. Бұл учаскедегі белгіленген жылдамдық — 100 км/сағ, жолаушылар пойызының нақты жылдамдығы — 92 км/сағ.

«ҚТЖ» АҚ басшысының айтуынша, М. Тынышбаев атындағы Қазақ көлік және коммуникациялар академиясы мен Бүкілресейлік теміржол көлігінің ғылыми-зерттеу институтының мамандары тартылған, олар орын алған фактілерді ескере отырып, пойыз жағдайын модельдеу бойынша ғылыми-техникалық зерттеулер жүргізеді.

Сондай-ақ, комиссия нақты жағдайда жолаушылар пойызының рельстен шығуы кезінде көршілес жатқан жолда жүк тасымалдау пойызының жүріп өтуін ұйымдастырды. Осы эксперименттің қорытындысы бойынша жолаушылар вагондарының жолдан шығып кету себебі жүк пойызымен жанасу емес екендігі анықталды. Мұндай жанасу жолаушылар вагондарының жолдан шығып кетуі салдарынан ғана орын алған.

«Қазіргі таңда комиссия жол учаскесі инфрақұрылымының техникалық жағдайын тексеріп жатыр. Жылжымалы құрамға аспаптық өлшемдер жүргізіледі. Тергеу нәтижесінде осыған ұқсас жағдайлардың алдын-алу үшін тиісті шаралар қабылданатын болады. Комиссия осы жылдың маусым айының соңына дейін жұмысты аяқтауды көздеп отыр. Бүгінде темір жолдың барлық учаскелерінде пойыз қозғалысының қауіпсіздігін бақылау күшейтілді», — деп мәлімдеді Қ. Алпысбаев.

ҚР ИДМ апатты зерттеу комиссиясының төрағасы — инвестициялар және даму бірінші вице-министрі Роман Скляр, өз кезегінде, қазіргі таңда министрлік тиісті қызметтер жоғары жылдамдықты аумақтарды уақытылы диагностикалауды тұрақты қадағалап жатқанын атап өтті.

«Тәртіпке сәйкес мұндай тексерістер айына екі рет өткізіледі. Соңғы диагностика кезінде жолдардың жағдайы техникалық талаптарға сай келген еді. Аталған пойыздың барлық вагондары 2012–2014 жылдары шығарылған, олар рейс алдындағы техникалық тексерістерден және нормативтік-техникалық құжаттаманың талаптарына сәйкес жөндеудің жоспарлы түрлерінен уақытылы өткізілген», — деді Р. Скляр.

Ішкі істер министрі Қалмұханбет Қасымовтың айтуынша, аталған оқиға бойынша қылмыстық іс қозғалған. Оқиға орнында Астанадан барған арнайы тергеушілер тобы жұмыс істеп жатыр.

«Қазір оқиға орнында куәгерлерден жауап алынып жатыр, сараптама жасауға әзірленудеміз. Қылмыстық істің тергелу барысы Ішкі істер министрлігі мен Бас көлік прокуратурасының бақылауында. Нәтижелері бойынша қосымша хабарлайтын боламыз», — деп баяндады Қ. Қасымов.

Оқиғадан зардап шеккендер мен оларға көрсетіліп жатқан медициналық көмектер туралы денсаулық сақтау министрі Елжан Біртанов баяндады. Мәселен, апат салдарынан 25 жолаушы түрлі жарақаттар алған, бір адам қаза тапқан. Жолаушыларға амбулаториялық медициналық көмек көрсетілді (17 — Жамбыл облысында, 8 — Алматыда). Медициналық көмек көрсетілген соң 24 адам үйлеріне қайтарылды. Бір жолаушыға ота жасау қажет болды: ол Шу қаласындағы ауруханаға жатқызылды және дәрі-дәрмектермен, медициналық көмекпен толыққанды қамтамасыз етілген.

Мәселені қарау қорытындылары бойынша, Премьер-Министр Бақытжан Сағынтаев бірқатар нақты тапсырмалар берді.

Атап айтқанда, «ҚТЖ»-ға Қарағанды облысының әкімдігімен бірлесіп тиісті көмектер көрсету және қаза тапқан жолаушының отбасына жәрдем беру жүктелді.

Денсаулық сақтау министрлігіне зардап шеккендерді бақылауға алу және олардың сапалы емделуін қамтамасыз ету тапсырылды.

Ішкі істер министрлігіне Инвестициялар және даму министрлігімен, «Қазақстан темір жолы» компаниясымен және басқа да мүдделі мемлекеттік органдармен бірлесіп вагондардың жолдан шығып кету себептеріне жан-жақты тергеу жүргізу тапсырылды.

«Аталған оқиғаны тергеу барысы менің жеке бақылауымда екенін айта кеткім келеді. Қанат Қалиұлы, сізге комиссия жұмысының қорытындылары бойынша оның нәтижелерін жұртшылыққа өзіңіздің жария етуіңізді тапсырамын», — деп түйіндеді Премьер-Министр.

Еске салайық, 17.06.2018 сағат 13:25-де «Астана — Алматы» бағытындағы №9 жолаушылар пойызының «Сарышаған — Шу» учаскесіне келгенде, Шу қаласынан 50 шақырым жерде 8 вагоны жолдан шығып кеткен, соның салдарынан 2 вагоны аударылып қалған.

www.primeminister.kz

Бүгін Үкімет үйінде ҚР Премьер-Министрі Бақытжан Сағынтаев Дүниежүзілік банк пен Халықаралық қаржы корпорациясының вице-президенттері Сирил Мюллермен және Джорджина Бейкермен кездесу өткізді.

Кездесу барысында Қазақстанның инвестициялық ахуалын одан әрі жақсартудың негізгі бағыттары талқыланды. Атап айтқанда, алдағы бес жылға арналған серіктестік стратегиясын дамыту, Қазақстанның экспорттық әлеуетін кеңейту, бизнес ахуалын және мемлекеттік институттарды нығайту, сондай-ақ адам капиталын айтарлықтай күшейту мәселелері қаралды.

Ынтымақтастық орнаған уақыттан бері Дүниежүзілік банк ҚР-ға 46 жобаны қаржыландыру үшін $8,1 млрд-тан астам қарыз берген. Бүгінгі таңда Дүниежүзілік банктің жобалар қоржыны 22 жобадан тұрады, оның ішінде 7 ағымдағы жоба және 15 жоба жалпы $4,1 млрд сомасына серіктестік туралы келісімдер аясында іске асырылуда. Ағымдағы жобалардың қоржыны $3,2 млрд сомасына 7 жобаны қамтиды.

Халықаралық қаржы корпорациясының Қазақстандағы стратегиясы инфрақұрылымға қолжетімділікті арттыруға, қаржы секторын нығайтуға және экономиканы әртараптандыруға және бәсекеге қабілеттілікті арттыруға қолдау көрсетуге бағытталған. 1997 жылдан бері корпорация ҚР экономикасына $1,4 млрд астам инвестиция салды, соның ішінде қаржы, газ, тау-кен өнеркәсібі, ауыл шаруашылығы және өнеркәсіп салаларында жеке сектордың 60 жобасын іске асыруға қолдау көрсету үшін, бірлестірілген қарыздар түрінде $300 млн инвестиция салды.

www.primeminister.kz

Сейсенбі күні, 19 маусымда, сағат 10:00-де Үкімет үйінде ҚР Үкіметінің отырысы өтеді.

Отырыстың күн тәртібінде:

АӨК дамытудың мемлекеттік бағдарламасын өзектендіру;

«Нұрлы жер» тұрғын үй құрылысы мемлекеттік бағдарламасын іске асыру және өзектендіру;

Алматы агломерациясын іске асыру барысы.

Отырыс қорытындысы бойынша ҚР Үкіметінің баспасөз орталығында Инвестициялар және даму министрлігінің басшылығы өкілдерінің қатысуымен баспасөз конференциясы өтеді.

Тікелей таратылымдарды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Мұрағат

Маусым
2018
ДсСсСрБсЖмСнЖк
123
45678910
11121314151617
18192021222324
252627282930

Мемлекеттік орган басшыларының блог-тұғырнамасы

Өту